Kommunerujussuarni aqutsisussanut qinersilernermi Inatsisartunut ilaasortarpassuit, Kitaata/Tunup qinersiviinnaani qulersuit, qinigassanut ilaapput. Ilaat maanna kommunalbestyrelsiusunut ilaasortaareeraluarput, kisiannili aamma nutaanik ilaqarlutik.
Maanna kommunalbestyrelseqarnermi takoreerparput Inatsisartunut ilaasortanik issiasoqartillugu suliat ataqatigiissumik ingerlaneq ajortut, taamatullu kommunini suliat tammartutullusooq pisartut ilaasortat kommunalbestyrelsimit sulinermit peqataanngippallaaraangata Inatsisartunut ilaasortatut suliassat pissutigalugit.
Pissutsit taamaannerat kissaatiginanngikkaluartumik Inatsisartunut ilaasortanik isertoqassappat kommunerujussuanngornermi pitsaanerulernavianngilaq, minnerunngitsumik eqqarsaatigigaanni kommunerujussuanngornerup aallartisarneqarnerani suliassat imaannaanavianngitsut ilaannakuusumillu peqataaffigineqarsinnaanngitsut.
Taamaattumik kommunerujussuaqarneq iluamik aallartissappat pisariaqarpoq kommunerujussuarni aqutsisuni qinikkat taassuminngaannaaq aallussinissaat, saniatigut naalakkersuinikkut allanik qinigaaffeqaratik.
Taamaattumik qinersisartut maannangaaq paasisariaqarpaat Inatsisartunut ilaasortat kommunerujussuarni aqutsisunut qinigassanngortittut qinigaagunik Inatsisartuni ilaasortaanerminnik qanoq eqqarsaatersuuteqarnersut.
Qinersisussat unneqqarissumik nalunngittariaqarpaat Inatsisartunut ilaasortamik qinersiniarunik qinerniagartik ilumut ilumoorussilluni kommunerujussuarmi aqutsisuni ilaasortaaniarnersoq, asuli qinersisunik katersiniaannarluni sassarnersoq imaluunniit qinigaaguni Inatsisartunit ilaasortaanerminit tunuarniarnerluni eqqarsaateqareernersoq.
Oqareernittut kommunerujussuassani suliassat imaannaanavianngillat tamakkiisumillu tunniusimalluni suliarineqartariaqarlutik!
—–
Pineqartoq ataasinngornermi 31. marts Qanoruumi sammineqarpoq, takorusukkukku ugguuna isiginnaarneqarsinnaavoq. Qinikkat apersorneqartut isumaqannguatsiarput qangatut kommunalbestyrelsinut qinersilersugut §.-) Naagga, kommunerujussuassamiuna aqutsisussanik qinersilersugut, aaqqissuussinermik nutaarluinnarmik atuutilersitsisussanik, taamaattumillu tamakkiisumik tunniusimasariaqartunik!
Torrak! Ole Heinrich.
Qinikkat marlunnik nasaqarlutik sullisisinnaanerat naalakkanut marlunnut kiffartornerusoq ajornartorsiuteqarfiussasorlu takusinnaasimagit paasineqarsinnaavoq, ilumoorputillu. aamma ilanngulugu eqqarsaatigineqarsinnaavoq kommunini sulisooreerlutik qinikkatut inissisimalertartut sunamitaava nasaq imaluunniit kiinappak sorlermitaava atorlugu innuttaasunik sullissisarpat. Ole tamaviaaginnarit iluatsilluarinalu.
Ole Heinrich
Ilumoorluinnarputit, tamannalu peqqutigalugu Siumut Sisimiut ukiuni amerlaqisuni maannamut Inatsisartunut ilaasortaajutigalutik Kommunalbestyrelsemi ilaasortaatitaqartarsimanngilaq. Kingullermillu Inatsisartunut qineqqusaartoqarmat Kommunalbestyrelsemut ilaasortat arlariilluta qineqqusaaqataavugut. Kisiannili taassani erseqqilluinnartumik oqaatigaarput Inatsisartunut isissagaluarutta Kommunalbestyrelsemiit tunuarniarluta. Kisiannili qinersisartut Kommunalbestyrelsemi sulisoriniarsimagamisigut Inatsisartunut qinerneqarnerput annertuvallaanngilaq.
Siumut Sisimiut aamma ileqqoqarpoq qinikkatut issiasut (Inatsisartuniuppat Kommunalbestyrelsemiuppalluunniit) Siumup immikkortortaqarfiani siulersuisunut ilaasortaatittarnagit. Allanilli partiimi ilaasortat akornanniit siulersuisunik qinigassanngortittoqartarluta aammalu qinersisarluta. Tassani illoqarfimmi Siumup gruppea nukittunerusumik inissisimanissaa, ilaasortallu amerlanerusut assigiinngitsuni sunniuteqarluarsinnaanerat isummersoqataalluarsinnaanerunissaallu anguniarlugu taanna ukiorpassuanngortuni ileqqoraarput.
Isumaqarpungalu nukiit taamatut agguaalluartarsimanerisa Sisimiut Kommuneata maannakkumut killiffiata takutikkaa periaaseq pitsaanerpaaq atorneqarsimasoq. Taamaattumillu isumaqarpunga sinerissami amerlanerusut atorsinnaappassuk piukkunnaraluartoq, aammalumi partiit allat aamma tamanna paasisariaqaleraat.
Tamakkiisumik illuttut tummarluni sullissinissaq pisariaqarpoq, aatsaat taamatut sulisoqarneratigut suliat ilumoorullugit tamakkiisumik ingerlanneqarsinnaanngorsinnaapput.
Namminersornerullutik Oqartussani sulisut, Namminersornermut ikaarsaariarutta politikkikkut attuumassuteqanngilluinnarnissaat piumasariaqarpasipparput!
Taassumalu saniatigut Kommunerujussuarni atorfillittaaq politikkikkut attuumassuteqanngilluinnassasut piumasarineqartariaqarpoq!
—–
Asasara Maasi
Ilisimatitsissutigiinnassavara kikkulluunniit atorfitsik apeqqutaatinnagu qinigaaffinnut sunulluunniit qinigassanngortissinnaatitaammata.
Allaasarpoq pineqartut qinigaappata. Naatsorsuutigaarali pineqartut ima inersimatigisartut nalusarnagu qinigaaffimmut ima qanitsigisumik sulillutik atorfitsik qimattariaqarlugu.