Namminersulernissamut suliniaqatigiiffimmit NAMMINEQ-mit ilisimatitsissutigineqarpoq Namminersorneq pillugu isumalioqatigiissitap isumaliutissiissutaa naatsorsuutigineqartoq atsiorneqassasoq sisamanngornermi 17. april 2008. Tamatumunnga atatillugu inuiaat kalaallit kaammattorneqarput isumaliutissiissut atsiorneqarpat erfalasuleqqullugit.
Kaammaattuut matumuuna blogginnut isertartunut ingerlateqqippara.
Qununata, saperata - Siunissamut!
Apeqqut:
Qanormita “isumalioqatigiissitap isumaliutissiissutaa” naatsumik oqaatingalungu imaqarpa? Taavalu atsiorneqareerpat, nunatsinnut qanoq sunniuteqassua? Imatut paasillungu qanoq siunissarput aaliagiiffingineqassua?
Inussianersumik
Jan
—–
Aluu Jan
Namminersulernermi pissusiulersussat massakkut nalunngisavut naatsumik oqaatigalugit imaapput:
- Inuiaat Kalaallit inuiattut immikkoorutilittut akuerineqassapput
- Oqaatsivut pisortatigoortumik nunatsinni oqaatsitut inissisimalissapput
- Naalagaaffiup ataatsimoortumik aningaasaliissutigisartagai ingerlaannassapput
- Pisuussutinit uumaatsunit nunatta isertitaasa affaat naalagaaffimmit ataatsimoortumik tapiissutaasartut annikillisarneqarnissaannut atorneqassapput
- Naalagaaffimmiit oqartussaaffinnik nutaanik tigusinermi taakku nammineq akilertassavagut, taamaattumillu nammassinnaasagut ilutigalugit oqartussaaffinnik suli tigunngisatsinnik tigusisassalluta
- Namminersorneq pillugu inatsimmi namminiilivinissamut inatsisitigut periusissaq takuneqarsinnaassaaq
Taamaattumik Namminersorneq (ukiamut taasissutigisassarput) Namminersornerunermut sanilliullugu aningaasatigut artukkiinani Namminersulivinnissamut ikaarsaariarnissamut annertunerusumik sakkussanik tunisisussaassaaq.