Kapisillit – Siumut!

Nunalerinermik Siunnersorteqarfiup qangali nalilereerpaa Nuup kangerluani Kapisillit eqqaanni Neriunamiit avannamut tallimanik savaateqarfiliortoqarsinnaasoq, umimmaateqarnermik naatitanillu naatitsisarnermik tapertalerneqarsinnaasunik.

Nammineq nioqqutissiatsinnik pilersornerulernissarput eqqarsaatigalugu pisariaqavippoq savaateqarfinnik amerlanerunik pilersitsinissap pimoorullugu suliniutigineqarnissaa.

Unnialu Nuup kangerluata savai mamat §.-)

Kapisillit – Siumut! 

8. april 2008 kommunerujussuassatsinni siunissami aqutsisussanik qinersilerpugut. 

Kommunerujussuanngortitsinerup qularnanngitsumik, minnerunngitsumillu inuit nammaqatigiinnermik nunaqarfiillu piujuarnissaannik pingaartitsisut qinigaanerisigut, kingunerissavaa nunatsinni inuussutissarsiornikkut, sullinneqarnikkut, suliffissaqarnikkut aningaasaqarnikkullu naligiinnerulerneq. Kommunerujussuanngornikkut illoqarfinni nunaqarfinnilu ullumikkornit naligiinnerusumik inuit atugarisaasigut ineriartortitsisoqarsinnaalissaaq. 

Kommunerujussuarmi Nuuk kisimi ineriartortinneqarsinnaanngilaq. Ineriartornissamut periarfissat aamma kommunerujussuassami illoqarfinnut allanut nunaqarfinnullu saatinneqarnerusariaqarput, taakku najugaqarfigissallugit orniginarnerusunngorlugit.  Nunaqarfiit periarfissat naapertorlugit ineriartortinneqartariaqarput suliffissatigut aammalu assigiinngitsutigut sullinneqarnikkut minnerunngitsumik kulturikkut sunngiffimmilu neqeroorutitigut. Kulturikkut sunngiffimmilu peqqinnartumik sammisaqarnissamut periarfissanut neqeroorutit inuussutissarsiornerup ineriartornera, taamatullu aamma kommunerujussuarmi illoqarfinnut allanut nunaqarfinnullu nuukkusussuseq ikorfartortariaqarpaat. 

Taamaattumik qularnaarneqartariaqarpoq saarulliit uteqqilernerat ilutigalugu tunitsivissat qularnaarneqarnissaannut kommunip peqataasariaqarnera. Kommunerujussuit inuussutissarsiornikkut ineriartortitsinermut peqataanerusinnaanerat pisariaqavippoq. Ullumikkut killiliussat qeratavallaaqaat! Tamatumunnga peqatigitillugu nunaqarfinni innaallagissiorfiit naammassisaqarsinnaassusiat imeqarniarnerlu isiginiartariaqarput, pisariaqarpallu annerusaavigalugit iluarsiivigalugillu. Kapisilinni ataavartumik tunitsiveqalernissaq pisariaqavippoq, tamatumunngalu peqatigitillugu talittarfeqarnikkut pissutsit aamma iluarsineqartariaqarlutik. 

Kapisillit immikkut eqqarsaatigalugit savaateqarnerup ineriartortinneqarnissaanut periarfissaqarpoq, immaqa umimmaateqarnermik tapertalerneqarsinnaasumik. Nunalerinermut Siunnersorteqarfiup siusinnerusukkut nalilereerpaa Kapisillit eqqaanni Neriunamiit avannamut savaateqarfinnik tallimanik pilersitsisoqarsinnaasoq. Neriunami toqoraaviliorneq aamma eqqarsaatigineqarsinnaavoq. Periarfissat tamakku atorluarneqassappata tamakkununnga eqeersimaartumik kommunerujussuarmi aqutsisuni issiasoqartariaqarpoq.  

Inuussutissarsiornerup ineriartortinnissaanut takornariaqarneq aamma ilaalluinnarpoq. Taamaattumik pingaartippara kommunerujussuassami nunaqarfiit immikkut pingaartillugit takornarialerinerup ineriartortinneqarnissaa, innuttaasut qanimut suleqatigalugit peqatigalugillu. Tamatumunnga atatillugu immikkut pingaaruteqarpoq nunaqarfinni takornariat unnuiffissaqarlutillu nerinissaminnut periarfissaqarnissaat. 

Kapisillit inissisimanertik pissutigalugu kommunerujussuassami takornariartitsinikkut qitiusussat ilagisariaqarpaat. Kapisillit eqqaat pinngortitaq pinngortitami sunngiffimmi misigisaqarnissamut periarfissanik ulikkaarpoq. Taamaattumik aamma Nuup Kapisillillu akornanni pisulluni aqqutigineqarsinnaasumik, tassungalu atatillugu illuaraliortiternermik, suliniuteqarneq unigani sakkorusartariaqarpoq. 

Inuussutissarsiornikkut (aalisarneq, savaateqarneq takornariaqarnerlu) ineriartortitsinikkut qularnanngitsumik Kapisillit nunasiffigissallugit orniginarnerulissapput. Taamaattumik tamatumunnga tunngatillugu atuarfeqarnikkut pissutsit siumut isigaluni iluarsiniarneqarnissaat pisariaqarpoq Nuummukartarneq pisariaarutsillugu. Illut sunngiffimmi sammisaqarfiusinnaasut piorsarneqarnissaat aamma pisariaqassaaq. 

Kapisilinni illoqarnikkut, taamatullu aamma imermut attaveqarnermut tunngasutigut, nutarterisoqarnissaa pisariaqarpoq. 

Nunaqarfinni inuuniarnikkut atugarisat inuussutissarsiornikkullu ineriartornissamut periarfissat pillugit nalunaarsuiffimmik pilersitsisoqartariaqarpoq, tunngavissaasutigut naapertuilluartumik piumasaqaatitalinnik. Tunngavissaasutigut naapertuilluartumik piumasaqaatini meeqqat inuusuttullu illersorneqarnissaat sakkortuumik pingaartinneqartariaqarpoq. 

Nunaqarfimmiut naqisimaneqaratik eqeersimaarlutik suleqatigiillutillu inooqatigiissut naligiimmik periarfissaqarlutillu atugassaqartut, naalakkersuinikkut aningaasaqarnikkullu tamakkiisumik naammassineqarsimasumik oqartussaaqataasut, kiisalu assigiimmik naleqassuseq aallaavigalugu ingerlasut aammalu kulturikkut naqisimaneqaratik suliniuteqarsinnaasut suliaqartullu nunatta siunissaata ilagai! 

Qinersilluarisi!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s