Internet tamanut!

Internettersinnaaneq inuttut pisinnaatitaaffiusaqariaqarpoq!

Pisortat ingerlatsinerat avammullu paasissutissiisarnerat inuillu apeqqutinik naalakkersuinermut tunngasunik oqallinnerat annerujartuinnartoq internettikkut ingerlanneqaleriartorpoq.

Tamatumani internettip atorneqaleriartuinnarnera qularnanngitsumik aamma nunatsinni keermiaa innuttaaqatitta ilaasa ineriartornermit katataanerannik kinguneqartussaavoq aallaqqaammut qularnaanngikkutsigu tamatta internettimik atuisinnaanermut periarfissaqarnissarput.

Naqitanik atuarsinnaannginneq qanga ajornartorsiutaavoq. Maannakkulli paasissutissarpassuit naqitatut nassaariuminaatsut internettimi imaaliaallaannaq nassaassaalernikkuupput, taamalu internettimut isersinnaanngikkaanni ilisimalikkat nutaarpassuit pissarsiarineqarsinnaanatik.

Assersuutitut taalaarusuppara Namminersornerullutik Oqartussat siorna nutaamik nittartagartaarnikuupput. Nutaatut aamma ilanngunneqarsimavoq oqartussat arlaannik tusarniaassutaannik ilanngussisarfik, tassuuna innuttaasut kikkulluunniiit tusarniaassutigineqartut pillugit namminneq isummersorsinnaagaluarlutik.

Atorneqarpali? Naamerluinnaq! Illuatungaani ajornanngippaallarpoq arlaatigut naammagittaalliuutigineqarpat naammattumik tusarniaasoqarsimannginnerarlugu innersuussutigissallugu ”nittartakkatsinni takuneqarsinnaagaluarpoq”!

Pissutsit taamaannerata takutiinnarpaa kikkut tamat internettimik atuisinnaanissaat qularnaanngikkutsigu nunatsinni paasissutissanik siammarterisarnermi ajornartorsiuteqalersussaasugut ”qunnermik” pisortat innuttaasullu akornanni. Pisortat isumaqartut, aahh nittartakkatsinnut ilanngutereerpagut, illuatungaani innuttaasut periarfissaqanngitsut nittartakkat pineqartut iserfiginissaannut!

Taamaattummik nunatsinni innuttaasut tamarmik internettimik atuisinnaalertariaqarput, tamannalu ilaatigut anguneqarsinnaavoq nunatsinni pisortat sullissiviini tamani innuttaasut akeqanngitsumik internettimut isersinnaanerannik periarfissiinikkut!

Tassanili soorunami pineqanngillat nittartakkat ass. facebookitut ittut §.-), kisiannili nittartakkat paasissutissanik inuk nammineq pillugu imallit, soorlu tusarniaassutinik taaneqareersunik aamma assersuutigiinnarlugu siorna akileraarutigisimatsinnut tunngasunik imallit.

Internet tamanut!

Nuuk nuan’, Tasiilaq alianaak!

Qujanartumik internettip nassaarineqarneratigut nunarsuatsinni nunatsinnilu pisunik pineri malillugit malinnaasinnaalersimavugut. Malinnaavigineqarsinnaasut ilagaat webcamit, tassa internettimi sumiiffinni assigiinngitsunit sarsuatitat, ilaatigut massakkorpiaq silap qanoq inneranik takutitsisinnaasut.

Nuannertarmata alakkartarlugit kommunerujussuanngortussami Kitaa/Tunumi webcamit uku alakkaqqussavakka:

Hendriks webcam i Tasiilaq

 Nuummi Radiup Qaqqaaniit Tuapannguit tungaannut

Uggornaraluartumik Nuuk Kommuniata nittartagaani webcamimut allanut ingerlaqqiffissat quppernerup nutarterneranut atatillugu katassimannguatsiaramik. Iluarsippata ingerlaqqiffissaliiumaarpunga. Uaniittussaapput.

Kommunerujussuarmik suli massakkornit annertunerusumik internet ataatsimuulersitsisinnaammat siunissami kommunerujussuarmi illoqarfinnit nunaqarfinniillu tamanit kommunit allaffiinit ajornanngitsumik webcamiliisoqarsinnaammat tamanna qularnaarniarumaarpara.

Internet – innuttaasut oqartussaaqataanerat!

Internettip naalakkersuinermik suliaqarnermi innuttaasullu akornanni oqallinnermut qanoq atorneqarsinnaanera sapaammi 30. marts Nuummi Ukaliusap Atuarfiata  kantiinaani qinersisartunik ataatsimiisitsinermi erseqqilluinnartumik saqqummersinneqarpoq partiit ilisaritereernerisa kingorna partiit sammineranni akileraartarnermut tunngasut, taamatullu aamma Inatsisartunut ilaasortarpassuit kommunerujussuanngornissamut qinigassanngortinnerat annertuumik sammineqarmata matumani oqallissaarutitut saqqummiussakka tunngavigalugit.

Maluginiarnerpaavara marloqiusanik qinigaaffeqartarneq pillugu Inatsisartunut ilaasortat imminnut illersornerat, piumassuseqaraannigooq tamaasa ataatsikkut ingerlanneqarsinnaammata, namminneq aalajangigassarigitsik il.il.

Imatut oqaannarlanga – ilissiuna qinersisartut tamanna aalajangigassarigissi!

Uggornaraluartumik ulloq taanna qineqqusaartunut ilaanngilanga, taamaattumik qilanaaqaanga qinersisartunik ataatsimiisitsinissanut aggersunut.