Nunaqarfiit ataavarlit!

IA-p siulittaasorisimasaa IA-p nittartagaani bloggimini ”aappaluttumi” (qernertunngornikumi! – qanormi taassagaluaraanni allaat naalakkersuisugut silaqarluannginnerarlugit allattalersimammat – Naalakkersuisut silaqassutsikkut anguneq ajornartut) nunaqarfiit nappaqqillugit, pissaaneq nunaqarfinnut siusinnerusukkunngooq oqarluartaarutaasarsimasut illaruaatigalugit marsip sisamaani 2008 ilanngussaqarpoq – Anersaakkut piumassusikissuseq 2008.

Ilaalaannguasik, tupinnassaqaaq matuma kingorna suli nunatsinni isorliunerusuni nunaqarfinnilu IA-qassappat §.-) saqqummiussaami suli parteeqataanit illuatungilerneqanngimmat.

Inuiattut namminiilersinnaannginnatta inuit tamaasa Nuummut katersorlugit siunissarpullu Nuummiigani illoqarfinni allaniillunilu nunaqarfinniimmat kommunerujussuanngornissamilu nunaqarfiit inuiaqatigiit ineriartornerannut misigisimallutik unigatik ingerlanissaat qularnaartariaqarmat Kitaata/Tunup kommunerujussuassaani Nuup kommuniata nunaqarfinni aqutsisunut namminneq atugassaannik aningaasanik aalajangersimasunik amerlassusilinnik atugassiisarnera kommunerujussuassami nunaqarfinnut tamanut atugassanngortinneqartariaqarpoq!

Ilisimatitsissutigineqassaaq Kapisilinni aqutsisut namminneq atugassaminnik millioninik ataatsinik Qeqertarsuatsiaanilu aqutsisunut millioninik marlunnik namminneq siunertanut aalajangersimasunut atorsinnaasaminnik 2008-mi aningaasaliivigineqarmata. Aaqqissuussineq kommunerujussuarmi nunaqarfinnut tamanut atuutilertariaqarpoq! Tamanna aamma isumaqarpoq nunaqarfinni aningaasat atorneqarnissaannut akisussaasunik qinikkanik suli aqutsisoqartuassasoq!

Nunaqarfiit ataavarlit!