Ittoqqortoormiit – Siumut!

Kommunerujussuanngortussami Kitaa/Tunumi sullissinerup pitsaanerulerneranik misigisaqaqqaartussat qularnanngitsumik tassaassapput maanna Ittoqqortoormiit kommunermiut.

Nunatta ineriartornerani Ittoqqortoormiit missukutaajuarsimapput maannalu periarfissaqalerpugut tamatuma ilorraap tungaanut saatinneqarnissaanut, aamma kommunerujussuarmut tamarmut iluaqutaasussamik.

Kommunerujussuanngornikkut pissutissaqalissaagut ineriartornerup Nuup avataanut aamma siammarnissaanut, taamalu taakku najugaqarfigissalugit kajungernarnerulersillugit.

Ittoqqortoormiini ineriartortitsinissamut periarfissarpassuaqarpoq maanna atorluarneqanngitsunik. Piniarneq eqqarsaatigiinnarlugu piniartut pisaminnik tunisinissaminnut killerujussuarmik periarfissaqarput tunitsiviup qerititsiviata aseroqqajaanerujussua pissutigalugu. Ajornartorsiut taanna piaartumik iluarsineqartariaqarpoq kommunerujussuup peqataaneratigut, aamma umimmannik timmissanillu tunisisarsinnaaneq eqqarsaatigalugu.

Tunu takornariaqarnikkut ineriartortitsivigissallugu periarfissanik qalaarpoq, tamatumanilu aamma Ittoqqortoormiit periarfissaqarluarlutik nunatta avannaarsuani eqqissisimatitsivimmut takornariaqarnikkut aallaaviunermigut. Tamatumunngalu atatillugu takornarianik sullissinnermut atatillugu pisariaqartitat pigineqalernissaat qularnaartariaqarpoq.

Tassunga aamma ilaasariaqarpoq Nerleriit Inaanni mittarfiup mittarfimmik Illoqqortoormiinut qaninnerusumik pilersitsinissap piviusumik sulissutigineqalernissaa. Missingerneqareerpoq ujaraaqqanik qallikkamik mittarfik 20 mill. kr.-it inorlugit akilimmik suliarineqarsinnaasoq, aningaasallu pineqartut kommunerujussuup iluani nassaarineqarsinnaareeerlutik.

Nuup avataani ineriartortitsinissaq pisariaqarpoq, tamannalu aatsaat qularnaarneqarsinnaavoq kommunerujussuaq tamaat isigalugu suliaqarsinnaasunik kommunerujussuanngortussami aqutsisuni ilaasortaqarpat!

Ittoqqortoormiit – Siumut!